कोरोना भाइरस नफैलियोस् भन्दै मान्छेलाई काँडाले पिटपाट र खसीलाई गाउँ निकाला

बिष्णु फडेरा, हुम्ला । विश्वमा महामारीको रुपमा फैलिएको कोरोना भाइरस (कोेभिड१९)को संक्रमण नफैलियोस् भन्दै कर्णाली प्रदेशका गाउँका बासिन्दा दैवी शक्तिको भर पर्न थालेका छन् । परापूर्वकालदेखि नै दैवी शक्तिको पर्दै आएको दावी गर्दै कर्णाली जिल्लाका बासिन्दा कोरोना भाइरसको महामारीका बीच पनि दैवी शक्तिको भरमा परेका हुन् । आपतविपतमा दैवी शक्तिको आराधना गर्दै आएका उनीहरुले शनिबार गाउँमा कोरोना भाइरस प्रवेश नगरोस् भन्दै गाउँका सबैलाई काँडाले पिट्ने र खसीलाई गाउँ निकाला गरेका छन् ।

हुम्ला जिल्लाको साविकको सर्किदेउ गाविस हाल सर्केगाढ गाउँपालिका १ र २ नंवर वडाको रिपमा शनिबार राति ६ बजे गाउँमा सबैको घरका मुख्य व्यक्तिले आफ्ना परिवारलाई रोग, भोक र शोक नलागोस् भनेर काँडाले चोट नलाग्ने गरी पिट्दै, होहल्ला गर्दै गाउँदेखि करिब १ किलोमीटर टाढा र देउताले भने बमोजिमको सामान फालेको स्थानीय शिक्षक नवराज फडेराले बताए । शिक्षक फडेराका अनुसार परापूर्वकालदेखि नै मान्दै आएको देउताले भने बमोजिम गर्दा रोग र भोकले गाउँलाई नछुने मान्यता रहेको छ । सर्की देउता हेराएर रातो कपडामा जौ, दाल र रातै कपडाले छोपेर खसीलाई गाउँ वरिपरि घुमाएर गाउँ निकाला गरे देउताले रोग आउन नदिई आफ्ना भक्तजनको सुरक्षा गर्छन् भन्ने जनविश्वास रहेको स्थानीय बिर्सिंङ फडेराले बताए ।

१२ किशिमका अनाज बनाएर खसीको टाउकोमा घुमाएर गाउँको चौबाटो पर्ने सांगुडीमा फालिएको वडा नं.२ रिपमा प्रशासन सहायक पासाङ महताराले बताए । यसरी फाल्दा कोरोना भाइरस गाउँमा प्रवेश नगर्ने विश्वास रहेको महताराको भनाई छ । गाउँलेले १० हजार रुपैयाँ संकलन गरेर खसी किनिए पनि खसीको मुल्य भने नतोकिएको महताराले बताए ।

त्यसै गरी रिप गाउँमा बाहिरबाट आउने कसैलाई पनि गाउँमा प्रवेश गर्न नदिन लेप्च्यामा हेल्थ डेक्स स्थापना गरिएको छ भने स्थानीयले पनि अन्य गाउँबाट आउनेहरुलाई गाउँ प्रवेश गर्न नदिन कडाई गरिरहेका छन् ।

Leave a Reply

Your email address will not be published. Required fields are marked *