तनहुँमा पहिरोमा परी किशोरीको मृत्यु, ५ जना बेपत्ता

गएराति तनहुँमा पहिरोले घर भत्किँदा १ किशोरीको मृत्यु भएको छ । पहिरोमा ५ जना बेपत्ता छन् भने १ घाइते छन् । अविरल वर्षापछि तनहुँको म्याग्दे गाउँपालिका र रिसिङ गाउँपालिका गरी फरक फरक स्थानमा पहिरोले घर पुरेको हो ।

म्याग्दे गाउँपालिका वडा ६, बेलौतेडाँडामा घरमाथिबाट आएको पहिरोले घरको भित्ता पुरिँदा १७ वर्षीया किशोरी लक्ष्मी विकको मृत्यु भएको जिल्ला प्रहरी कार्यालय तनहँुले जनाएको छ ।

राति पौने १ बजे गएको पहिरोले घाइते भएकी लक्ष्मीको उपचारार्थ रत्नहरि अस्पताल दमौली लगिएकोमा उपचारक्रममा सोमबार बिहान सवा ५ बजे मृत्यु भएको हो ।

उता, रिसिङ गाउँपालिका वडा ८, पल्टयाङ भैसिलिकीका अनबहादुर थापाको २ वटा घर पहिरोले पुरिँदा ५ जना बेपत्ता भएका छन् । पहिरोले अनबहादुरकी श्रीमती ६० वर्षीया ज्योतिमाया थापा घाइते छिन् ।

राति साढे १ बजे घरमाथिबाट आएको पहिरोले घर पुरिँदा उनका जेठा छोरा ३० वर्षीय भेषबहादुर, बुहारी २९ वर्षीया नानुमाया, नातिनी ५ वर्षीया अमिषा बेपत्ता भएको प्रहरी नायव उपरीक्षक राजेन्द्रबहादुर रेग्मीले जानकारी दिए ।
यस्तै, अनबहादुरका कान्छा छोरा २२ वर्षीय महादेव र बुहारी १९ वर्षीया मनिसरा पनि बेपत्ता छन् ।

बेपत्ताको जिल्ला प्रहरी कार्यालय तनहुँको टोलीले स्थानीयको सहयोगमा खोजी जारी राखेको छ । अर्को घरमा सुतिरहेको अवस्थामा राति आएको पहिरोले घाइते भएकी ज्योतिमायालाई उपचारार्थ भीमादतर्फ पठाइएको छ । बेपत्ता ५ जना नजिकैको छुट्टै घरमा सुतेका थिए ।

Leave a Reply

Your email address will not be published. Required fields are marked *