दुई साताभित्र परीक्षण नगरे घर जाने क्वारेन्टाइनमा बस्नेको चेतावनी

बझाङ । भारतका विभिन्न शहरबाट जिल्ला फर्किएर क्वारेन्टाइनमा बसेका स्थानीयले क्वारेन्टाइनमा बसेको २ साताभित्र कोरोना परीक्षण नगरे आफूहरु बिना परीक्षण घर जाने चेतावनी दिएका छन्। भारतका विभिन्न ४ क्वारेन्टाइनमा करिब ३२ दिन रहेर नेपाल फर्कि बैशाख १८ गते जिल्लाका विभिन्न क्वारेन्टाइनमा बसिरहेकाहरुले यस्तो चेतावनी दिएका हुन् ।

सरकारले तोकेअनुसार दुई हप्ता वा थप केही दिन आफूहरु क्वारेन्टाइनमा बस्ने तर समयमै परीक्षण नगरे त्यसपछि आ-आफ्नो घर लाग्ने उनीहरूले बताएका छन् । अन्नबाली भित्र्याउने समयमा आफुहरु क्वारेन्टाइनमा बस्नु परिरहेकाले खेतबारीमै अन्न खेर गएर भोकमरी हुने चिन्ताका कारण छिटो कोरोना परिक्षण गरेर घर जान दिनुपर्ने बुंगल नगरपालिकाका स्थानीय मानसिंह बोहराले बताए।

भारतबाट आएका ३ सय ८४ जना बुंगल नगरपालिकाको क्वारेन्टाइनमा बसिरहेका छन् । जिल्ला स्वास्थ्य कार्यालयले भने कोरोना परीक्षण किट अभावका कारण उनीहरुको स्वास्थ्य परीक्षण गर्न नसकिएको जनाएको छ । भारत तथा अन्य जिल्लाबाट आएकासमेत गरी ५ सय ३२ जना जिल्लाका विभिन्न १२ स्थानीय तहका क्वारेन्टाइनमा रहेका छन् । जसमध्ये विथ्थडचिर गाउँपालिकामा ९६ केदार स्युँ गाउँपालिकामा २६, बुंगल नगरपालिकामा ३ सय ८४, छविस पाथिभेरा गाउँपालिकामा २६, खप्तड छान्ना गाउँपालिकामा ९ र सुर्मा गाउँपालिकामा ७ जनालाई क्वारेन्टाइनमा राखिएको छ ।

हालसम्म जिल्लाभर ९ सय १७ जनाको आरडिटी परीक्षण गरिएको छ । ती मध्ये एक जनाको मात्रै रिपोर्ट नेगेटिभ आएको स्वास्थ्य कार्यालयले जनाएको छ। रिपोर्ट नेगेटिभ देखिएका भारतबाट आएका ती ३५ वर्षीय पुरुषको स्वाब परीक्षणका लागि कैलाली पठाइएको छ।

Leave a Reply

Your email address will not be published. Required fields are marked *