विश्व महामारी, न्युयोर्कमा मात्रै मर्ने १० हजार नाघ्यो

विश्वकै स्वप्न नगरको दर्जा पाएको अमेरिकी सहर न्युयोर्क कोरोना महामारीले विक्षिप्त बन्दै गइरहेको छ । न्युयोर्कमा कोरोना भाइसरको संक्रमणबाट मर्नेको संख्या १० हजार नाघिसकेको छ । यो अमेरिकामा यस संक्रमणबाट मर्ने पीडितहरुको कुल संख्याको करिब आधा हो । अमेरिकामा अहिलेसम्म कोविड १९ संक्रमणबाट मर्नेको संख्या २२ हजार नाघिसकेको छ ।

सहरमा कोरोना महामारीको स्थितिका बारेमा अवगत गराउने क्रममा न्युयोर्कका गभर्नर एन्ड्रयु क्युमोले उक्त जानकारी दिएका हुन् । उनलै सबैभन्दा खराब समयको अन्त्य भइसकेको बताउँदै बिस्तारै बिस्तारै जीवनलाई सामान्य मार्गमा ल्याउनुपर्ने बताए ।

यसअघि न्युयोर्कमा ठुलो त्रासदी सेप्टेम्बर ११ हमलामा झेलेको थियो । उक्त घटनामा केही इस्लामिक कट्टरपन्थी लडाकूहरुले न्युयोर्कको म्यानह्याटनस्थित विश्व व्यापार केन्द्रका जुम्ल्याहा गगनचुम्बीमा अपहरित यात्रुवाहक विमान ठोक्काएर आक्रमण गरेका थिए । उक्त आक्रमणमा करिब ३ हजार मारिएको थियो ।

भाइरसविरुद्धको खोप उपलब्ध भएपछि सबै समस्या अन्त्य हुने तर त्यसका लागि अझै १२ देखि १८ महिना लाग्न सक्ने उनले बताए । गभर्नर भने– ‘हामीले आफ्नो कामले रेखालाई सिधा पारेका छौं । न्युयोर्कवासी एक अर्काको ज्यान बचाउन अगाडि आए । हामी मजबुत न्युयोर्कवासी हौं ।’

हालसम्म यस विश्व महामारीले विश्वभरि मर्नेको आंकडा १ लाख १९ हजार ७ सय पुगेको छ । यस भाइरसको संक्रमणको चपेटामा आउने १९ लाख २५ हजार नाघिसकेको छ । अमेरिकामा संक्रमित संख्या सबैभन्दा बढी ५ लाख ८७ हजार नाघेको छ भने मर्नेको संख्या २३ हजार ६ सय ४४ पुगेको छ ।

दोस्रो सबैभन्दा प्रभावित देश इटालीमा मर्नेको संख्या २० हजार ४ सय ६५ पुगेको छ । यहाँ संक्रमित संख्या स्पेनको भन्दा केही कम १ लाख ५९ हजार ५ सय नाघेको छ । स्पेनमा संक्रमित सख्या १ लाख ७० हजार नाघेको छ भने यहाँ मर्नेको संख्या १७ हजार ७ सय ५६ पुगेको छ ।

Leave a Reply

Your email address will not be published. Required fields are marked *