५ किलोको ट्युमर फालेपछि कवाडी एम्बुलेन्समा सररर

नेपाल क्यान्सर हस्पिटल एण्ड रिसर्च सेन्टर हरिसिद्धिमा गालाको ट्युमरको जटिल तर सफल शल्यक्रियापछि निको भई दोस्रो जीवन पाएर महोत्तरीका ४० वर्षीय अलिम कवाडी शुक्रबार घर फर्किएका छन् । अस्पतालमा भर्ना भएको ३३ दिन र शल्यक्रियाको ठीक एक महिनापछि उनी निको भएर घर फर्किएका हुन ।

हड्डीबाट लाग्ने ‘लो ग्रेडको ओस्टेओ सार्काेमा’ भएर गालामा ५ किलो २ सय ग्रामको मासु पलाएपछि उनको दाँहिने गालाको ट्युमरको सफलतापूर्वक शल्यक्रिया गरिएको थियो । ट्युमर काटेर झिकेको भागमा तिघ्राको मासु काटेर जोडेर प्लाष्टिक सर्जरी गरिएको छ । उनकी गर्भवती पत्निले केहीदिन अघि छोरी जन्माएको खवर सुनेपछि अस्पतालले उनलाई महोत्तरी घरसम्म जान एउटा एम्वुलेन्सको व्यवस्था गरिदिएको थियो ।

‘हामीले १८ हजार रुपैयाँ तिरेर एउटा एम्वुलेन्सको व्यवस्था गरिदिनुका साथै घरसम्म जान र लकडाउन खुलेपछि फेरी उपचारको लागि फलोअपमा आउन थप १० हजार रुपैयाँ व्यवस्था गरिदिएका थियौं’—नेपाल क्यान्सर हस्पिटल एण्ड रिसर्च सेन्टरकी निर्देशक एवम् नेपाल क्यान्सर सहयोग समूहकी संयोजक स्वरुपा श्रेष्ठले भन्नुभयो ।

‘शल्यक्रिया गरिएको गाला निको भएपछि उनलाई अस्पतालमै राख्नुभन्दा भर्खरै जन्मिएकी छोरी र पत्निसंग खुसी वाँड्दा उनी स्वस्थ र खुसी हुन्छन’—निर्देशक श्रेष्ठले भन्नुभयो ।

उनी फलोअपमा आएपछि बाँकी उपचार सो अस्पतालका कार्यकारी अध्यक्ष एवम् वरिष्ठ क्यान्सर विशेषज्ञ डा.सुदिप श्रेष्ठले गर्ने जनाइएको छ ।
विपन्न विरामीको लागि सरकारले दिने एकलाख रुपैयाँ बाहेक उनको उपचारमा लाग्ने सबै खर्च अस्पतालले वेहोरेको थियो भने औषधि लगायतका अरु खर्च सहयोगी दाताहरुबाट संकलन गरिएको थियो ।

गत फागुन २१ गते बुधबार त्रिविवि शिक्षण अस्पतालमा प्रधानमन्त्री केपी ओलीको दोस्रोपटक मिर्गाैला प्रत्यारोपण हुँदै गर्दा नेपाल क्यान्सर हस्पिटलमा विपन्न कवाडीको दायाँ गालामा पलाएको ५ किलो २ सय ग्राम तौलको ट्युमर भएको भाग काटेर निकालिएको थियो । क्यान्सर हस्पिटलका कार्यकारी अध्यक्ष डा.सुदिप श्रेष्ठको सहयोगमा सो अस्पतालको नाक, कान, घाँटी क्यान्सर विभागका प्रमुख डा.प्रभातचन्द्र ठाकुरको नेतृत्वमा सो विभागका अर्का चिकित्सक प्रवीण जयसवालसहितको चिकित्सक टोलीले उक्त जटिल शल्यक्रिया गरेको थियो ।

चिकित्सक टोलीले ३ घण्टा लगाएर ट्युमर भएको भाग काटेर झिकेको थियो भने वरिष्ठ प्लाष्टिक सर्जन डा.सुरेन्द्र बस्नेत र डा.कृष्ण नगरकोटी सहितको टोलीले ट्युमर काटेर झिकेको भागमा तिघ्राको मासु काटेर जोडेर प्लाष्टिक सर्जरी गरेको थियो । यसअघि एनेस्थेसियन डा.आभा प्रसाई, डा.दिपक अधिकारी र डा.सुनिता मलेकुले एनेस्थेसियाको पाटो सम्हालेका थिए ।

‘झण्डै २० सेन्टीमीटर लम्वाई, १२ सेन्टीमिटर चौडाई र ५ किलो २ ग्रामको ट्युमर भएको गालाको मासु काटेर फ्याँकी त्यसमा प्लाष्टिक सर्जरी गर्ने काम सहज थिएन’—कवाडीको जटिल शल्यक्रियाको नेतृत्व गरेका वरिष्ठ सर्जन डा.ठाकुरले बताएका थिए ।

‘अरु अस्पतालले आँट नगरेको शल्यक्रिया र प्लाष्टिक सर्जरी हामीले सफलतापूर्वक सम्पन्न गर्यौं’—डा. ठाकुरले भने । अलिम पुर्णरुपमा स्वस्थ भईसकेका छन । अब साधारण उपचार मात्रै गर्नुपर्ने र उनले चाहेमा गालामा थपिएको एउटा नक्कली आँखा राख्न सकिन्छ । उपचार खर्चकै अभावमा विगत ५ वर्षदेखि गालामा पलाएको ट्युमरको शल्यक्रिया गर्न नपाएर कवाडी जीवन मरणको दोसाँधमा रहेका कवाडीको उपचारको लागि सहयोगी हातहरुको पहलमा सहयोगी चन्दादाताहरुले आर्थिक सहयोग गरेर उनको जीवन बचाउन सहयोग गरेका थिए ।

विरामी कवाडीको गालाको सफल शल्यक्रियापछि क्यान्सर अस्पतालले गत फागुन २७ गते पत्रकार सम्मेलनको आयोजना गरि अस्पतालका कार्यकारी अध्यक्ष डा.सुदिप श्रेष्ठले नेपालमै सबैप्रकारका क्यान्सरको उपचार हुने भएतापनि विपन्न क्यान्सर रोगीले उपचारको लागि हात फैलाउनुपर्ने वाध्यताको अन्त्य हुनुपर्ने बताउनुभएको थियो ।

Leave a Reply

Your email address will not be published. Required fields are marked *