कोरोना खोप निजी कम्पनीले पनि ल्याउन पाउने, सरकारी खोप भने निःशुल्क

कोरोनाविरुद्धको खोप निजी कम्पनीले पनि ल्याउन पाउने गरी सरकारले प्रक्रिया अघि बढाएको छ । यद्यपि निजी कम्पनीले ल्याउने खोप भने सरकारले किन्ने छैन ।

स्वास्थ्य मन्त्रालयमा विहिबार आयोजित पत्रकार सम्मेलनमा स्वास्थ्य तथा जनसंख्यामन्त्री हृदयश त्रिपाठीले निजी कम्पनीलाई पनि खोप ल्याउन दिने गरी मापदण्ड बनाउने बताए ।

उनका अनुसार निजी कम्पनीको खोप निजी प्रयोजनमा दिन सकिनेछ । तर, सरकार आफैंले खोप किने निःशुल्क लगाउने उनले बताए । सरकारले ल्याएको खोप निःशुल्क हुने र मापदण्डभित्रका मान्छेलाई लगाइनेछ ।

निजी कम्पनीले निजी प्रयोजनका लागि ल्याउन सक्ने गरी व्यवस्था गरिने मन्त्री त्रिपाठीले बताए । सरकारले हालैमात्र २० लाख डोज खोप किन्न भारतसँग प्रक्रिया अघि बढाइसकेको छ ।

२ साताभित्र सो खोप नेपाल आउने बताइएको छ । खोपका लागि सरकारले १ अर्ब रूपैयाँ अर्थमन्त्रालयमार्फत निकास गर्दैछ । चीनको खोपलाई पनि आकस्मिक प्रयोगका अनुमति दिइएको छ । चीनले पनि ५ लाख डोज खोप अनुदानमा दिएको छ ।