प्रधानमन्त्री केपी ओलीलाई भेट्न बालुवाटार पुगे महन्थ ठाकुर

जसपा अध्यक्ष महन्थ ठाकुर प्रधानमन्त्री केपी ओलीलाई भेट्न बालुवाटार पुगेका छन् । विपक्षी गठबन्धनलाई नसघाएर तटस्थ बसेका उनी बिहीबार साँझ ओली भेट्न बालुवाटार पुगेका हुन् । उनकै असहयोगका कारण काँग्रेस नेतत्वमा बहुमतको सरकार बन्न सकेन भने फेरि ओली नै प्रधानमन्त्रीमा नियुक्त हुँदैछन् ।

प्रधानमन्त्री ओली र ठाकुरबीच भेटवार्ता भइरहेको प्रधानमन्त्रीको सचिवालयले जनाएको छ । नेपाली कांग्रेस र नेकपा माओवादी केन्द्रले संयुक्त सरकारका लागि दाबी नगर्ने भएपछि ओली फेरि प्रधानमन्त्री बन्दैछन् ।

जसपाका नेता ठाकुर र राजेन्द्र महतो ओली इतरको गठबन्धन सरकारका निम्ति तयार भएका थिएनन् । एमालेभित्र फेरि सहमतिको संभावना बढेको र जसपाभित्र पनि गठबन्धनका निम्ति ठाकुर र महतो तयार नभएपछि काँग्रेस र माओवादी केन्द्र पछि हटेका हुन् ।

आजै एमाले अध्यक्ष ओली र वरिष्ठ नेता माधवकुमार नेपाल बीच चार घण्टा लामो संवाद भएको थियो । एक्लाएक्लै भएको संवाद सहमति नजिक देखिएको नेताहरुले बताएका छन् ।