राजेन्द्र महताेको अभिव्यक्ति नेपाललाई विखण्डन गर्ने’ : वामदेव गौतम

नेकपा एमालेका उपाध्यक्ष वामदेव गौतमले नवनियुक्त उपप्रधानमन्त्री राजेन्द्र महताेको अभिव्यक्तिलाई लिएर असन्तुष्टि व्यक्त गर्नुभएको छ ।

संविधानको मर्म विपरित काम गर्ने छैन भनेर सपथ ग्रहण गरेको आधा घण्टा नबित्दै बहुराष्ट्र र बहुराज्य बनाउने मुक्ति आन्दोलन आफूहरुले अहिले पनि सञ्चालन गरिरहेकाे भन्ने अभिव्यक्तिप्रति उहाँले असन्तुष्टि जनाउनुभएको छ ।

उहाँले भन्नुभएको छ, ‘संविधानको धारा ४ मा स्पष्ट भनिएको छ, नेपाल अनेकौँ विशेषता सहितकाे राज्य हो । यसको अर्थ हो, नेपालमा एउटा मात्र राष्ट्र छ र एउटा मात्र राज्य छ त्यो नेपाल हो । राजेन्द्र महतोले अहिले पनि सञ्चालन गरिरहेको त्यो कथित आन्दोलन नेपाललाई विखण्डन गर्ने भन्दा अर्को हुन सक्दैन । नेपाललाई विखण्डन गर्ने आन्दोलन कुनै पनि देशभक्त नेपालीका निम्ति स्वीकार्य हुन सक्दैन ।’

उपाध्यक्ष गौतमले राजेन्द्र गौतमको त्यो मागलाई अस्विकार र विरोध मात्र गर्न सकिनेसमेत बताउनुभएको छ । यस्तै उहाँले प्रधानमन्त्री केपी शर्मा ओली राजेन्द्र महतोले सञ्चालन गरिरहेको मुक्ति आन्दोलनबारे अनभिज्ञता प्रकट गरेको सुन्दा आश्चर्य लागेकोसमेत बताउनुभएको छ ।