सचिवालय बिनानिर्णय सकिएपछि बालुवाटारमा ओली-प्रचण्डबीच छलफल

सचिवालयको बैठक बिनानिर्णय टुंगिएपछि नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच अहिले छलफल भइरहेको छ। दुई अध्यक्षबीच भोलिका लागि डाकिएको सचिवालय बैठक गर्ने/नगर्ने, बैठक बस्यो भने के प्रस्ताव पेस गर्ने भन्नेबारे छलफल भइरहेको स्रोतले जानकारी दिएको छ। यसअघि बैठकको बीचमै प्रधानमन्त्री ओली म थाकें भन्दै बैठकबाट उठेर गएका थिए।

प्रधानमन्त्री बैठकमा नफर्किएपछि बैठक बिनानिर्णय टुंगिएको थियो। बैठक सकिएपछि पत्रकारहरूसँग कुरा गर्दै प्रवक्ता नारायणकाजी श्रेष्ठले भोलि बस्ने स्थायी समिति बैठकमा पेस गर्ने प्रस्तावबारे दुई अध्यक्षबीच छलफल भइरहेको बताए। उनले भोलि स्थायी समिति बैठक बस्ने/नबस्नेबारे पनि दुई अध्यक्षले निर्णय गर्ने जानकारी दिएका थिए।

‘स्थायी कमिटी बैठकमा लैजाने प्रस्तावबारे दुई अध्यक्षहरूबीच अझै पनि गृहकार्य गर्न बाँकी रहेको बैठकलाई जानकारी गराइयो। दुई अध्यक्षले सल्लाह गरेर बैठकका कार्यसूची वा बैठक नै के गर्ने भन्नेबारे निर्णय गर्नुहुन्छ,’ श्रेष्ठले भने।

भोलि बस्ने पार्टीको स्थायी कमिटी बैठकमा पेस गर्ने प्रस्तावलगायत अन्य विषय छलफल गर्न नेकपा सचिवालय बैठक बसेको थियो।शनिबारको सचिवालय बैठकमा प्रधानमन्त्रीले आत्मआलोचना गर्दै सबै जना मिलेर अघि बढ्ने बताएका थिए। प्रधानमन्त्रीपछि अर्का अध्यक्ष पुष्पकमल दाहालले पनि मिलेर अघि बढ्नुको विकल्प नभएकोमा जोड दिएका थिए।

भोलि बस्ने स्थायी कमिटी बैठकका लागि दुबै अध्यक्षले प्रस्ताव तयार गर्ने भनिएको थियो। तर प्रस्ताव तयार गर्ने विषयमा दुई अध्यक्षबीच सहमति हुन सकेको छैन।

शनिबार भएका सहमतिबाट प्रधानमन्त्री पछि हटेको आरोप प्रचण्ड र माधवकुमार नेपाल खेमाले लगाएका छन्। पहिला सहमति भएअनुसार कार्यकारी अध्यक्षका रूपमा प्रचण्डको भूमिकालाई थप प्रष्ट्याउने गरी स्थायी समितिमा प्रस्ताव लैजाने, मन्त्रिमण्डल पुनर्गठन गर्ने र केही मुख्यमन्त्रीहरू फेरबदल गर्ने सहमतिबाट प्रधानमन्त्री ओली पछि हटेको प्रचण्ड-नेपाल खेमाको आरोप छ।

वैशाख १७ गतेको बैठकमा उपाध्यक्ष वामदेव गौतमलाई प्रधानमन्त्री बनाउने प्रस्ताव राखेका प्रधानमन्त्री ओलीले २० गतेको सचिवालय बैठकमा उक्त प्रस्तावबारे केही पनि उल्लेख नगरेपछि पछिल्ला दिनमा गौतम पनि आफ्नो हुर्मत लिएको भन्दै रूष्ट बनेका उनीनिकट नेताहरूले बताएका छन्।

बुधबार बिहानमात्र गौतम प्रचण्डलाई भेट्न उनको निवास खुमलटार पुगेका थिए। उनले आजै अर्का नेता माधवकुमार नेपाललाई फोन गरेको स्रोतको दाबी छ।